Mae\u2019r T\u00eem Cryfhau Teuluoedd yn arwain ar Baneli Ffiniau Gofal, Ymyrraeth Gynnar a\u2019r Cham-drin Domestig. Pwrpas y paneli amlasiantaethol hyn yw rhannu gwybodaeth a chynllunio ar gyfer cefnogaeth amserol, wedi\u2019i thargedu i gynyddu diogelwch, lleihau risgiau a gwella swyddogaeth a lles teuluoedd.<\/p>\n\n
Mae\u2019r Panel Ffiniau Gofal yn ymgynnull yn wythnosol ac yn cynnwys mynychwyr o Wasanaethau Iechyd Meddwl Plant a Phobl Ifanc (CAMHS) Cynadledda Gr\u0175p Teulu, Gwasanaethau Ieuenctid, Iechyd, Gwasanaeth Cyfiawnder Ieuenctid, a Gofalwyr Ifanc fel aelodau hirsefydlog. Mae\u2019n gyfarfod deinamig lle mae dull Arwyddion Diogelwch yn cael ei ddefnyddio fel ffordd o ystyried dangosyddion diogelwch o fewn teulu. Mae cynllun yn cael ei drafod ac adnoddau\u2019n cael eu dyrannu, os oes angen, i helpu sefydlogi a chryfhau sefyllfa\u2019r plentyn a\u2019r teulu.<\/p>\n\n
Rhwng mis Ebrill a mis Rhagfyr 2022, trafodwyd cyfanswm o 57 o deuluoedd yng nghyfarfodydd y Panel Ffiniau Gofal. Trafodwyd 23 teulu pellach yng nghyfarfodydd y Panel Ymyrraeth Gynnar.<\/p>\n\n
Mae Gwasanaeth Cyfiawnder Ieuenctid Conwy a Sir Ddinbych wedi bod yn paratoi i ddarparu Prosiect Turnaround y Weinyddiaeth Gyfiawnder o 1 Ebrill 2023 ymlaen. Mae\u2019r rhaglen wedi cael ei dylunio drwy ddefnyddio dull Cymorth Cynnar er mwyn galluogi\u2019r Gwasanaeth Cyfiawnder Ieuenctid i wella canlyniadau i blant ar ymylon y system gyfiawnder. Nod pennaf y rhaglen yw atal pobl ifanc rhag troseddu neu ail-droseddu drwy:<\/p>\n\n
Bydd y model darpariaeth Turnaround yn defnyddio dull gweithredu Cymorth Cynnar sydd wedi bod yn llwyddiant gyda rhaglenni ymyrraeth gynnar tebyg, megis Cefnogi Teuluoedd. Mae dadansoddiad o effaith pum mlynedd o raglen ymyrraeth gynnar Cefnogi Teuluoedd yn dangos gostyngiad o 38% mewn dedfrydau o garchar ymysg yr ifanc, a gostyngiad o 15% mewn euogfarnau ymysg yr ifanc o fewn y cohort.<\/p>\n\n
Fel gwasanaeth, bydd disgwyl i ni weithio gyda 38 o bobl ifanc bob blwyddyn. Byddwn yn darparu cefnogaeth Cymorth Cynnar wrth asesu a mynd i\u2019r afael ag anghenion sylfaenol a ffactorau risg sydd efallai wedi dod \u00e2\u2019r plentyn i gyswllt gyda\u2019r system gyfiawnder, gyda\u2019r nod o ddarparu datblygiad cadarnhaol. Disgwylir mai\u2019r heddlu a\u2019r llysoedd fydd yn gwneud atgyfeiriadau’n bennaf i\u2019r Gwasanaeth Cyfiawnder Ieuenctid, ond gall unrhyw ymarferydd sydd wedi cael cyswllt gyda\u2019r plentyn, yn ogystal \u00e2 rhieni’r plant wneud hefyd.<\/p>\n\n
Mewn ymateb i\u2019r fenter ddwy flynedd newydd hon, cafodd dwy swydd cyfnod penodol newydd eu creu o fewn y gwasanaeth, ac rydym yn y broses o recriwtio i\u2019r swyddi hyn ar hyn o bryd. <\/p>\n\n
Roedd y T\u00eem Lles Meddyliol y bwriadu ehangu eu cefnogaeth ers ei gychwyn yn ystod y pandemig, ac mae eu cynlluniau wedi bod yn llwyddiannus. Rydym wedi recriwtio i swydd Gweithiwr Iechyd Meddwl Proffesiynol Cymeradwy, sy\u2019n ddarpariaeth statudol, ofynnol gan Awdurdodau Lleol, ac sy\u2019n r\u00f4l broffesiynol, arbenigol. Cyfrifoldeb allweddol Gweithiwr Iechyd Meddwl Proffesiynol Cymeradwy yw gwneud ceisiadau ar gyfer cadw unigolion yn yr ysbyty, gan sicrhau bod y Ddeddf Iechyd Meddwl a\u2019i Chod Ymarfer yn cael ei ddilyn.<\/p>\n\n
Mae\u2019r data rydym yn ei gasglu am y gwasanaeth hwn (a ddarperir yn ystod oriau swyddfa) yn dangos cynnydd sylweddol yng ngweithgarwch Gweithiwr Iechyd Meddwl Proffesiynol Cymeradwy ers y pandemig; gyda 292 atgyfeiriad yn cael eu cofnodi yn 2022, 15 yn fwy na llynedd. Mae\u2019r t\u00eem wedi cefnogi myfyriwr sy\u2019n astudio i gymhwyso fel Gweithiwr Iechyd Meddwl Proffesiynol Cymeradwy yn ystod y flwyddyn hefyd, ac wedi nodi bod y mwyafrif o Weithwyr Iechyd Meddwl Proffesiynol Cymeradwy nawr wedi\u2019u hyfforddi mewn Rheolaeth Ymddygiad Cadarnhaol i gynorthwyo gwaith gydag unigolion sydd o bosib yn dreisgar. <\/p>\n\n
Fe wnaethom benodi Gweithiwr Cymdeithasol Adran 117 sy\u2019n gyfrifol am gefnogi\u2019r broses \u00f4l-ofal ar gyfer unigolion sydd wedi cael eu hanfon i\u2019r ysbyty o dan y Ddeddf Iechyd Meddwl a chael eu hanfon o\u2019r ysbyty wedi hynny. Mae oddeutu 298 o bobl yng Nghonwy sy\u2019n gymwys am gymorth A117, ac mae cael gweithiwr cymdeithasol ymroddedig a phrofiadol yn y swydd hon yn hollbwysig er mwyn sicrhau bod eu hanghenion yn cael eu diwallu\u2019n briodol ac yn gymesur, a bod eu llais yn cael eu clywed, eu bod yn cael eiriolaeth, ac i ddarparu adolygiad parhaus i osgoi methiant mewn lleoliadau. <\/p>\n\n
Yn ogystal \u00e2 hynny, gan ddefnyddio cyllid gan y Bwrdd Gwasanaeth Integredig Ardal, fe wnaethom recriwtio Gweithiwr Ymyrryd a Gweithiwr Cefnogaeth Gymunedol ychwanegol a fydd yn darparu cefnogaeth ddwys am gyfnod byr, wedi\u2019i llunio i helpu unigolion mewn ffordd strwythuredig, dan arweiniad yr unigolyn, sy\u2019n canolbwyntio ar adfer ac osgoi argyfwng lle bo hynny\u2019n bosibl a helpu\u2019r unigolyn i adennill sefydlogrwydd. Yn y pendraw, byddai\u2019n fuddiol petai\u2019r swydd hon yn cynnig cefnogaeth i bobl sy\u2019n cofrestru gyda\u2019r Coleg Adfer, i hwyluso\u2019r cynllun gweithredu sy\u2019n canolbwyntio ar adfer, ac i\u2019w helpu i gyrraedd eu nodau a\u2019u dyheadau o fewn y lleoliad hwnnw.<\/p>\n\n
Ar gyfer y gwasanaeth Gweithiwr Iechyd Meddwl Proffesiynol Cymeradwy, mae\u2019r gwaith ei hun yn heriol iawn, sef ymdrin \u00e2 phobl s\u00e2l iawn yn y gymuned. Serch hynny, mae\u2019r prif heriau o ran darpariaeth y gwasanaeth yn parhau i fod yn systemig yn nhermau diffyg argaeledd Meddygon Adran 12(2) cymeradwy (a all argymell derbyniad gorfodol ar gyfer asesiad neu driniaeth dan y Ddeddf Iechyd Meddwl 1983), oedi wrth i ambiwlansys gyrraedd i gludo\u2019r unigolyn i\u2019r ysbyty, a diffyg cyffredinol o ran gwl\u00e2u priodol. Mae hyn yn golygu y gall asesiad llawn gymryd hyd at 15 awr, ac yn aml, mae\u2019n rhaid derbyn yr unigolyn tu allan i\u2019r sir. <\/p>\n\n
Byddwn yn parhau i ganolbwyntio ar atal ac ymyrraeth gynnar, yn ogystal \u00e2 siwrnai adfer yr unigolyn. Byddwn yn parhau i ddarparu gwasanaeth ymatebol ac yn gweithio gyda chydweithwyr yn y Bwrdd Iechyd i ddatblygu strategaethau i oresgyn y problemau gyda\u2019r broses, sy\u2019n creu rhai o\u2019n heriau.<\/p>\n\n
Mae Cefnogaeth Ymddygiad Cadarnhaol yn ddull gweithredu sy\u2019n canolbwyntio ar yr unigolyn wrth gefnogi pobl ag anabledd dysgu, yn enwedig os ydynt wedi\u2019u haflonyddu, ac mewn perygl o niweidio eu hunain. Mae\u2019r dull hwn yn seiliedig ar weithio gyda phobl a\u2019u rhwydwaith cymorth i ddeall pam maent wedi\u2019u haflonyddu, yr effaith mae\u2019r amgylchedd yn ei gael arnynt, a\u2019r ffyrdd gorau i\u2019w cadw\u2019n ddiogel ac yn hapus.<\/p>\n\n
Rydym wedi cefnogi rhai o\u2019n haelodau staff sy\u2019n ymdrin ag anableddau i fynychu hyfforddiant er mwyn ennill cymwysterau Cefnogi Ymddygiad Cadarnhaol. Mae\u2019r hyfforddiant trosolwg wedi cael ei lunio gan Gydlynydd a Rheolwr T\u00eem mewnol, ac mae wedi cael ei beilota gyda th\u00eem o Weithwyr Cefnogaeth Sesiynol sy\u2019n gweithio gyda phlant a phobl ifanc gydag anghenion cefnogaeth cymhleth.<\/p>\n\n