Roedd angen clir, cydnabyddedig i’r adran gael strategaeth gomisiynu gryf ac adolygu gwasanaethau a gomisiynwyd ar hyn o bryd.
Beth sydd wedi newid?
Roedd y Gwasanaeth Lles Cymunedol a grëwyd yn 2014 yn cynnwys Adain Berthnasau Annibynnol a’r Trydydd Sector. Rŵan, mae’r tîm newydd hwn yn dwyn ynghyd y wybodaeth a’r sgiliau i sicrhau bod trefn gomisiynu effeithiol ar waith, a gefnogir drwy’r Datganiadau ar Sefyllfa’r Farchnad, Dadansoddiadau o Anghenion Poblogaeth, strategaeth gomisiynu eglur a ffocws o’r newydd ar sicrhau canlyniadau cadarnhaol i unigolion drwy wasanaethau a gomisiynir. Mae’r tîm yn cynnwys dau gomisiynydd, swyddog gwybodaeth, swyddog cyswllt trydydd sector, swyddog cyswllt sector annibynnol, swyddog cyswllt rhanbarthol a gweinyddwr, wedi’u dwyn ynghyd o dan Reolwr Adran profiadol, sy’n adrodd i’r Cyfarwyddwr.
Pa wahaniaeth y mae wedi’i wneud?
Rydym wedi datblygu Datganiadau ar Sefyllfa’r Farchnad yn canolbwyntio ar ddementia ac anableddau – yr angen, beth yw’r cyflenwad presennol, beth fydd yr angen yn y dyfodol, a sut olwg rydym yn bwriadu y bydd ar y cyflenwad hwnnw.
Rydym wedi diffinio’r gwerthoedd craidd a fydd yn llifo drwy ein prosesau comisiynu. Rydym wedi dechrau adolygu contractau presennol, yn chwilio am gyfleoedd i uno gwasanaethau, neu i sicrhau darpariaeth fwy effeithiol o anghenion unigol. Rydym yn adolygu ein trefniadau contractio cyfredol gyda’r sector darparwyr gofal annibynnol, gan edrych ar wahanol ffyrdd o’u cynorthwyo i ddarparu gwasanaethau ail-alluogi mewn cymunedau diamddiffyn a rhoi sicrwydd darparu i’r rhai sy’n derbyn gofal.
Mae’r Rheolwr Adran wedi datblygu perthnasau agosach gyda’r trydydd sector, mentrau cymdeithasol a’r sector annibynnol.
Bydd y gwahaniaeth a wneir gan y tîm i’w weld amlycaf dros y 12 mis nesaf, wrth i brosesau ar gyfer rheoli dyraniadau grant ddod yn Ddatganiadau Sefyllfa’r Farchnad mwy llyfn, a seiliedig ar anghenion ac yn cael eu datblygu i ddangos y cyfeiriad y mae’r awdurdod yn awyddus i ddatblygu gwasanaethau.
Bydd strategaeth gomisiynu eglur, benodol yn cael ei datblygu, a bydd ein dull o atal anghenion rhag cynyddu a sicrhau bod pobl yn cael eu cefnogi i fod yn annibynnol yn amlwg ynddo. Rydym yn cydnabod y galwadau presennol ar y sector cartrefi gofal a byddwn yn cynnal cyfarfodydd cyswllt chwarterol gan ddechrau yn ystod haf 2015 i sicrhau ein bod yn datblygu cysylltiadau mwy effeithiol gyda nhw. Byddwn hefyd yn sicrhau bod llais defnyddwyr gwasanaethau a dinasyddion yn llywio ein strategaeth gomisiynu a’n bod yn datblygu manylebau gwasanaeth mewn modd cydgynhyrchiol er mwyn sicrhau bod dinasyddion a defnyddwyr gwasanaeth yn dylanwadu’n ymarferol ar yr hyn rydym yn ei gomisiynu.