Nod rhaglen drawsnewid y Gwasanaethau Cymdeithasol yw hyrwyddo integreiddiad a chysondeb ar draws pob Gwasanaeth, cynyddu effeithlonrwydd yn y defnydd o adnoddau, cynyddu annibyniaeth a rheoli risg. Drwy greu’r gwasanaeth Safonau Ansawdd newydd, tynnwyd ynghyd timau presennol o fewn y gwasanaethau plant ac oedolion, gyda’r bwriad o ddatblygu Canolfan Ragoriaeth Safonau Ansawdd; i ymgorffori ymhellach diwylliant o welliant parhaus yn y Gwasanaeth, y Cyngor ac mewn asiantaethau darparu allanol, gyda phwyslais ar godi gwybodaeth diogelu, ansawdd ymarfer a thrwy hynny wella canlyniadau i ddefnyddwyr gwasanaethau.
Unwaith y bydd y Gwasanaeth Safonau Ansawdd wedi’i sefydlu’n llawn, y cam allweddol fydd darparu strategaeth a fframwaith ar gyfer prosesau a gweithdrefnau safonau ansawdd.
Beth sydd wedi newid?
Y sbardun allweddol ar gyfer newid yw tegwch safonau ar gyfer gwasanaethau oedolion a phlant. Wrth i wasanaethau Plant wynebu mwy o graffu statudol, yn draddodiadol mae’r broses sicrhau ansawdd wedi bod yn fwy cynhwysfawr nag mewn gwasanaethau Oedolion. Byddwn yn mynd i’r afael â’r anghysondeb hwn drwy ddatblygu fframwaith sicrhau ansawdd a fydd hefyd yn ystyried elfennau allweddol o’r gwasanaethau, fel cyfranogiad a datblygu gweithlu a dysgu.
Darn allweddol arall o waith ar gyfer y gwasanaeth fydd cynhyrchu safonau sicrhau ansawdd mewnol ar gyfer pob maes is-wasanaeth a mecanweithiau monitro i sicrhau bod cynlluniau adborth a gwelliant yn cael eu rhannu a’u cefnogi. Mae datblygu prosesau a gweithdrefnau o’r fath yn gwella ansawdd ar gyfer y sector gofal cymdeithasol gyfan ac yn sicrhau llywodraethu yn gadarn ac yn agored.