2015-16 - Conwy Social Services Annual Report

Camau Nesaf ar gyfer Partneriaeth Pobl Conwy a’r Grwpiau

Mae Partneriaeth Pobl Conwy yn parhau i fod wedi ymrwymo i gyfranogiad plant, pobl ifanc, teuluoedd a rhieni / gofalwyr yn y broses o wneud penderfyniadau ac yn cydnabod manteision gwrando ar ddefnyddwyr gwasanaethau. Bydd Bwrdd Partneriaeth Pobl Conwy a Grwpiau Canlyniadau Conwy yn parhau i wrando ar syniadau defnyddwyr gwasanaeth i ddatblygu gwasanaethau ymatebol ac effeithiol.

Byddwn yn parhau i ddefnyddio ein Cynllun Cyfathrebu sy’n dangos systemau a phrosesau i ategu Cytundeb Gweithredol Bwrdd Partneriaeth Pobl Conwy, sy’n gosod egwyddorion ar waith er mwyn sicrhau dealltwriaeth gyffredin o agweddau ymarferol gweithio mewn partneriaeth â budd-ddeiliaid amlasiantaeth ym Mwrdeistref Sirol Conwy.

Mae’r bartneriaeth hefyd yn cydnabod pwysigrwydd mewnoli ‘Deddf Gwasanaethau Cymdeithasol a Lles (Cymru) 2014, ‘Deddf Lles Cenedlaethau’r Dyfodol (Cymru) 2015’, ac yn gweithio gyda’r Byrddau Gwasanaethau Cyhoeddus newydd a ffurfiwyd.

Grŵp Canlyniadau Conwy 8 – Rhwydwaith Gofalwyr

Mae’r Rhwydwaith Gofalwyr wedi gweithio gyda’r Tîm Partneriaeth i brynu 2000 o goiniau troliau i’w defnyddio yn ystod sesiynau ‘galw heibio’ Gofalwyr, Wythnos Gofalwyr, Diwrnod Hawliau Gofalwyr ac unrhyw weithgareddau hyrwyddo a gyflawnir gan y Tîm Gofalwyr. Derbyniwyd yr arian gan Grant Gweithgareddau Lles Iechyd Cyhoeddus Cymru. Bydd y coiniau troliau yn galluogi Gofalwyr o bob oed i gael mynediad at y rhifau ffôn perthnasol a’r manylion gwefan i sicrhau eu bod yn gallu cael gafael ar wybodaeth, cymorth a chyngor pan fo angen, a thargedu Gofalwyr anhysbys gan sicrhau eu bod yn derbyn manylion cyswllt o ran lle i gael y cymorth iawn pan fo angen.

Grŵp Canlyniadau Conwy (7) – Gofal Diwedd Oes

Trefnodd COG 7 ‘Cyfnewid Dysg Arfer Da Gofal Diwedd Oes’ ym mis Mawrth 2016. Wedi’i anelu at weithwyr proffesiynol er mwyn eu hannog i gael yr hyder i ddechrau gan gael sgyrsiau ynghylch eu dymuniadau olaf, a chodi ymwybyddiaeth o ‘Ofal Diwedd Oes’ a ‘Gwasanaethau Profedigaeth’. Cyflwynwyd y wybodaeth ganlynol ar; Cynllunio Gofal Ymlaen Llaw, Trefniadau Diogelu rhag Colli Rhyddid, Byw Nawr/Live Now, ‘DeadSocial’ a Gwasanaeth Diwedd Oes Conwy. Roedd nifer dda yn bresennol yn y digwyddiad, cwblhawyd a rhannwyd adroddiad gwerthuso, a rhestrir rhai o sylwadau cadarnhaol y rhai oedd yn bresennol isod:

“Byddaf yn mynd â’r wybodaeth ddiweddaraf ar y Gwasanaeth Diwedd Oes yn ôl at y grŵp. Rydym fel grŵp allan ar y cyrion braidd ac nid ydym bob amser yn cael mynd i’r digwyddiadau hyn, ond rwy’n meddwl ei bod yn hanfodol i gael gwybodaeth mor gyfoes ag y gallwn i ddarparu gwasanaeth 100%”.

“Gwella fy nghyfathrebu ar farwolaeth a marw – gwella canlyniadau i gleifion”,

“Byddaf yn cyfeirio fy nghleifion at Dîm Diwedd Oes Conwy”.

Grŵp Cydlynu – Cyfathrebu, monitro, sicrhau ansawdd, ymgysylltu

Mae pob un o Gadeiryddion Grwpiau Canlyniadau Conwy yn aelodau o’r Grŵp Cydlynu, swyddogaeth y grŵp hwn yw canolbwyntio ar gyfathrebu, monitro, sicrhau ansawdd ac ymgysylltu yn ogystal â’u meysydd blaenoriaeth; Y Gymraeg, Gwybodaeth, Cydraddoldeb a Chludiant.

Cytunwyd a chymeradwywyd Cynllun Cyfathrebu sy’n amlinellu dulliau cyfathrebu ac adrodd rhwng amrywiaeth o grwpiau fel y Bwrdd PPI, grwpiau COG a grwpiau tasg a gorffen. Mae trefniadau hefyd yn eu lle i sicrhau bod perthnasau gwaith da yn cael eu sefydlu gyda grwpiau eraill fel y Clystyrau Meddygon Teulu i sicrhau bod gwybodaeth yn cael ei rhannu ar draws pob sector yn Sir Conwy.

Cytunwyd ar y Cylch Gorchwyl ar gyfer y grŵp ac mae’n cynnwys cynrychiolaeth dinasyddion er mwyn sicrhau didwylledd, tryloywder ac atebolrwydd. Anfonwyd datganiadau o ddiddordeb i fod yn gynrychiolwyr dinasyddion ac maent bellach wedi cael eu dewis a’u croesawu mewn cyfarfod Grŵp Cydlynu diweddar.

Grŵp Canlyniadau Conwy 5 – Lles Meddyliol, gwella lles emosiynol cadarnhaol ac iechyd meddwl da

Nododd COG 5 nifer o fylchau mewn hyfforddiant o gwmpas lles emosiynol ac iechyd meddwl, cytunwyd ar y dull canlynol:

Dull partneriaeth aml-asiantaeth wrth gyflwyno gwasanaeth
Targedu staff priodol ar gyfer yr hyfforddiant cywir
Sicrhau ei fod yn gost-effeithiol a defnyddio adnoddau presennol gymaint ag y bo modd.

Trefnwyd cyrsiau hyfforddi a’u darparu mewn partneriaeth; Cymorth Cyntaf Iechyd Meddwl a Chysylltu â Phobl.

Cymorth Cyntaf Iechyd Meddwl – nodwyd ei fod yn gwrs drud, darparwyd y cwrs yn rhad ac am ddim gan bartner achrededig, defnyddiwyd eiddo’r Cyngor a phrynwyd llyfrau adnoddau drwy Grant Gweithgareddau Lles Iechyd Cyhoeddus Cymru.
Cysylltu â Phobl – Nodwyd angen hyfforddiant penodol o gwmpas gweithwyr rheng flaen sydd angen hyfforddiant a chefnogaeth ar sut i ddelio ag unigolion sy’n bygwth lladd eu hunain tra’u bod ar y ffôn gydag aelodau staff Cyngor Bwrdeistref Sirol Conwy.

Dangosodd dull partneriaeth COG 5 ganlyniadau cadarnhaol, o ran lleihau costau, gan rannu adnoddau a defnyddio gwybodaeth ac arbenigedd, ac arbediad ariannol posib o £7280 i’r Awdurdod Lleol.

Grŵp Canlyniadau Conwy 4 – Gofal hirdymor, mae pobl gydag anableddau a chyflyrau cronig yn cael yr ansawdd bywyd gorau posibl

Mae COG 4 wedi cael gwybod am y dirywiad blynyddol yn nifer y bobl ym Mwrdeistref Sirol Conwy sydd wedi manteisio ar Archwiliad Iechyd i Oedolion Cymru ar gyfer unigolion sydd ag Anableddau Dysgu. Roedd Cyd-Gadeirydd COG 4 yn bresennol yn y cyfarfod Clwstwr Meddygon Teulu i dynnu sylw at hyn ym mis Mai. Yn dilyn trafodaeth bellach yn y COG bydd grŵp tasg a gorffen yn cael ei sefydlu i nodi’r rhwystrau rhag manteisio ar Archwiliad Iechyd Cymru. Yn ogystal, bydd y grŵp yn ceisio mynd i’r afael â materion sy’n ymwneud â chasglu gwybodaeth yn ystod y broses archwiliad iechyd i lywio gwelliannau mewn gwasanaethau.

Mae’r Grŵp Tasg a Gorffen Chyfathrebu wedi datblygu ‘Canllaw Cyfathrebu Hygyrch’ i hysbysu unigolion a’u trefniadaeth o agweddau ar gyfathrebu sy’n bwysig i’w hystyried pan fyddant mewn cysylltiad â phobl sydd ag anawsterau cyfathrebu. Boed hynny wyneb yn wyneb neu drwy ddulliau eraill o gysylltu, er enghraifft dogfennau, posteri, neu lythyrau ac ati mae’r canllaw hwn wedi ei anelu at weithwyr proffesiynol sy’n gweithio gydag unigolion ag anableddau; (gan gynnwys nam ar y synhwyrau, byddar neu drwm eu clyw, anableddau corfforol, anableddau dysgu, a chyflyrau cronig). Y camau nesaf ar gyfer COG 4 fydd ymgorffori’r canllawiau o fewn prosesau cyflwyno Gwasanaethau Cymdeithasol Bwrdeistref Sirol Conwy a hyrwyddo defnydd gyda phartneriaid a sefydliadau aml-asiantaeth eraill. Rhannwyd y canllaw gydag aelodau’r Bwrdd a chafwyd ymateb cadarnhaol iawn.

Grŵp Canlyniadau Conwy 3 – Mae pobl hŷn yn ddiogel ac yn annibynnol

Mae COG 3 yn parhau i weithio ar eu blaenoriaethau; codymau, dementia ac ynysu cymdeithasol. Cynhyrchwyd pecyn gwybodaeth atal codymau, sy’n rhoi cyngor a chyfarwyddyd ar gyfer unigolion sydd mewn perygl o gael codymau i’w helpu i aros yn ddiogel ac yn annibynnol. Cynhaliwyd digwyddiad ‘Galw Heibio Dementia’ yn Llanrwst er mwyn codi ymwybyddiaeth a rhoddodd gyfle i’r cyhoedd gael sgwrs gyda gweithwyr proffesiynol ar ddatblygu Llanrwst fel cymuned gyfeillgar i ddementia yn y dyfodol.

Ar hyn o bryd mae’r Grŵp Tasg a Gorffen Unigrwydd ac Ynysu Cymdeithasol yn adolygu sut mae pobl yn edrych ar ymddeol. Amlygodd gwybodaeth a gasglwyd gan y grŵp nifer o enghreifftiau lle mae pobl wedi symud i Gonwy i ymddeol gyda’u partneriaid ond i ffwrdd oddi wrth aelodau eraill o’r teulu. Mewn rhai achosion efallai y bydd un partner yn mynd yn sâl, neu’n marw sydd felly’n gadael unigolion sydd mewn perygl o gael ei ynysu’n gymdeithasol oherwydd unigrwydd, afiechyd neu leoliad. Yn dilyn hynny mae’r grŵp wedi datblygu dau holiadur er mwyn cael gwell dealltwriaeth o sut mae pobl yn cynllunio ar gyfer eu hymddeoliad. Un ‘holiadur cyn ymddeol’ i ddarganfod a yw pobl yn cynllunio, pa oedran, ac am beth. Mae’r holiadur arall ‘ar ôl ymddeol’ i gael dealltwriaeth o safbwyntiau’r rhai sydd eisoes wedi ymddeol. Bydd y canlyniadau’n galluogi cyflogwyr a gweithwyr i gael dealltwriaeth o realiti ymddeoliad, nid yn unig yr elfen ariannol, ac annog unigolion i ystyried, cyn iddynt ymddeol, agweddau emosiynol a lles eu bywydau yn y dyfodol.

Grŵp Canlyniadau Conwy 2 – Atal afiechyd ac annog byw yn iach ac yn egnïol

Mae COG 2 yn parhau i gefnogi nifer o flaenoriaethau sy’n gysylltiedig ag arferion byw’n iach yng Nghonwy a chefnogi ‘Sgrinio am Oes’, ‘Ymgyrch Ffliw’ a’r mentrau rhoi’r gorau i ysmygu canlynol; ‘Stoptober’ yng ngweithleoedd Bwrdeistref Sirol Conwy, ‘Diwrnod Dim Smygu’ Sefydliad Prydeinig y Galon a’r ymgyrch ‘Quit for you and Quit for Them’.

Darparwyd hyfforddiant ymyriadau byr ysmygu a hyfforddiant atal alcohol i weithwyr proffesiynol sy’n gweithio gyda chleientiaid sydd am roi’r gorau i ysmygu neu yfed llai o alcohol. Cytunodd y rhan fwyaf o’r rhai a oedd yn bresennol yn gryf bod yr hyfforddiant yn bodloni eu disgwyliadau. Amlygodd cyfranogwyr rai o’r sylwadau canlynol;

“Rwy’n gweithio fel Therapydd Galwedigaethol ac yn ddiweddar roedd erthygl yn ‘OT News’ ynghylch: swyddogaeth OT i gynorthwyo i roi’r gorau i ysmygu – amserol iawn – teimlo y gallaf ddefnyddio technegau a addysgwyd!”

“Da iawn, cwrs i ysgogi’r meddwl”

“Dysgais gymaint heddiw ac yn teimlo fy mod wedi cael llawer gwell dealltwriaeth o’r anawsterau a wynebir wrth roi’r gorau i ysmygu”

“Mae’r cerdyn crafu alcohol yn adnodd gwych”

Dewisodd Cyngor Ieuenctid Conwy iechyd rhywiol fel blaenoriaeth ac maent wedi gweithio gyda COG 2, anfonwyd arolwg i ysgolion a cholegau ar ddarpariaeth iechyd rhywiol ac addysg a chafwyd dros 500 o ymatebion. Holwyd nifer o gwestiynau am wahanol themâu gan gynnwys gwybodaeth, rhyngweithio atal cenhedlu gyda gweithwyr proffesiynol ac addysg;

“A oes gennych chi unrhyw syniadau am yr hyn a fyddai’n eich gwneud yn fwy cyfforddus gyda mynd i weld gweithwyr meddygol proffesiynol ynglŷn â’ch iechyd rhywiol?

Bod yn fwy sicr o gyfrinachedd (31) 36%
Dim man aros cymunedol neu amseroedd aros cyflymach (12) 14%
Doctor o’r un rhyw (11) 13%
Doctor digynnwrf (9) 10%
Mynd ar eich pen eich hun (5) 6%
Mynd gyda ffrind neu deulu (6) 7%
Doctor nad yw’n beirniadu (5) 6%
Ei wneud yn bwnc mwy agored, siarad am y peth mewn addysg (4) 5%

Y prif ganfyddiad a nodwyd gan y bobl ifanc oedd materion cyfrinachedd, cynhyrchodd Cyngor Ieuenctid Conwy boster ac mae hwn wedi cael ei rannu gydag ysgolion, fferyllfeydd a Meddygfeydd, cynhyrchwyd ffilm fer yn dilyn eu taith ac mae ar gael ar YouTube:

https://www.youtube.com/watch?v=k6t2BNOj-Og&feature=youtu.be

Grŵp Canlyniadau Conwy 1 – Plant a Phobl Ifanc

Mae COG 1 yn parhau i weithio ar eu hardaloedd, mae eu haelodaeth wedi cael ei adolygu a pherthnasau gwaith newydd wedi eu sefydlu. Y camau nesaf ym mis Medi 2016 yw adolygu’r cynllun a’r blaenoriaethau gwasanaeth presennol, a chynnal gweithdy gydag aelodau o COG 1 ac is-grwpiau i ystyried a chytuno ar ffrydiau gwaith newydd.

Comisiynwyd y Grŵp Tasg a Gorffen Prydau Ysgol am Ddim wedi i fwlch gael ei nodi yn nifer y prydau ysgol am ddim a fanteisiwyd arnynt o’i gymharu â hawl yn ysgolion Conwy. Cyflwynwyd dull ysgol gyfan ‘Ein Cinio Ysgol’ er mwyn bod yn holl gynhwysol, osgoi stigma a sicrhau bod ysgolion yn ymateb i’r Mesur Ysgolion Iach (Cymru) 2009.

Ymgynghorwyd gyda Phenaethiaid, Cyngor Ieuenctid Conwy, a gweithiwyd gyda’r Grŵp Gweithredu Maeth Ysgolion / Bwyd o Bwys (SNAG / BOBS) sy’n fentoriaid sy’n rhannu gwybodaeth a sgiliau ynghylch bwyta’n iach mewn ysgolion.

Mae gwaith y Grŵp wedi dangos bod y dull cynhwysol sy’n cynnwys yr holl fudd-ddeiliaid yn cynhyrchu canlyniadau cadarnhaol, yn sicrhau bod plant a phobl ifanc yn cael gwell dealltwriaeth ynghylch bwyd, maeth a lles i gynyddu eu datblygiad eu hunain ar gyfer y dyfodol.

Mae hefyd yn cyfrannu at leihau gordewdra a chynyddu cyrhaeddiad.

Wedi hynny, enwebwyd Adran Arlwyo Conwy fel un o’r 7 Gwasanaeth Arlwyo sydd wedi gwella fwyaf ar lefel cenedlaethol ym mis Rhagfyr 2015, trwy’r Gymdeithas Rhagoriaeth mewn Gwasanaeth Cyhoeddus. Roedd hyn o ganlyniad i % uwch (1.8%) o ddisgyblion cynradd yn manteisio ar bryd ysgol am ddim yn 2014/15 (82.3%), o’i gymharu â 2012/13 (80.5%). Rhannwyd gwybodaeth gyda Bwrdd Partneriaeth Pobl Conwy a COG 1 a byddwn yn parhau i fonitro’r nifer sy’n manteisio ar brydau ysgol am ddim.

I gael gwybod mwy am waith SNAG / BOBS yn un o’u Sesiynau Coginio yn Ysgol y Creuddyn gyda David Preston, Cogydd dan Reolaeth, Ysgol Y Creuddyn;

https://www.youtube.com/watch?v=Ho4fofhM8us

Partneriaeth Pobl Conwy

Mae Partneriaeth Pobl Conwy yn bartneriaeth wedi’i hadlinio yn sgil uno Partneriaethau Partneriaeth Plant a Phobl Ifanc a Cydbartneriaeth Ardal Conwy yn seiliedig ar ganllawiau gan gynllun ‘Cydamcanu – Cydymdrechu’ Llywodraeth Cymru ar integreiddio partneriaethau a chynlluniau.

Cynhaliwyd cyfarfod cyntaf Bwrdd Partneriaeth Pobl Conwy ym mis Ebrill 2015, mae’r bwrdd yn cynnwys partneriaid allweddol traws-sector strategol aml-asiantaeth i weithio ar egwyddorion a blaenoriaethau a rennir. Mae gwaith y Bartneriaeth yn hysbysu ‘Cynllun Integredig Sengl Un Conwy – Gweithio Gyda’n Gilydd am Ddyfodol Gwell’. Cynorthwyo i gyflenwi’r Grwpiau Deilliant Conwy (COGs) a sefydlwyd nifer o grwpiau tasg a gorffen. Mae rhai o lwyddiannau’r grŵp eleni yn cael eu rhestru isod.

Datblygu Polisi

Datblygu’r rhaglen Diogelu Oedolion

Gallu cyfyngedig sydd gan yr Uned Ddiogelu i ddatblygu’r gwaith o gwmpas Diogelu Oedolion ac mae hwn yn faes blaenoriaeth dros y 12 mis nesaf.

Gweithredu’r Model Arwyddion Diogelwch yn y prosesau Cynhadledd Achos

Mae’r Uned Ddiogelu yn ystod camau cyntaf y gwaith o gyflwyno’r broses ymagwedd SOS at Gynadleddau. MaeHunan Esgeulustod / Celcio

Cafwyd dau achos anodd eleni sydd wedi tynnu sylw’r gwasanaeth at yr angen i ddatblygu ein gwybodaeth am, a’r sgiliau wrth weithio gyda phobl sy’n hunan-esgeuluso ac yn celcio.

Mentrau arfer newydd

Sefydlu cynllun “Pan Fydda i’n Barod” (WIR) erbyn 1 Ebrill 2016

Roedd yn rhaid i bob Awdurdod Lleol baratoi cynllun WIR erbyn 1 Ebrill 2016. Datblygwyd gwaith rhanbarthol a lleol sylweddol er mwyn paratoi ar gyfer y ddyletswydd newydd hon.

Creu Strategaeth Llety a Chymorth ar gyfer Gadael Gofal

Nid oes gennym lety / cefnogaeth addas ddigonol ar gyfer rhai sy’n Gadael Gofal ac mae angen i ni leihau nifer y llety Brecwast Gwely dros dro rydym yn cael mynediad iddo i’r rhai sy’n Gadael Gofal ac adeiladu portffolio o leoliadau yn seiliedig ar y dadansoddiad o anghenion a’r Strategaeth ddiwygiedig.

Heriau wrth gyflwyno gwasanaethau iechyd meddwl eilaidd integredig.

Mae gwasanaethau iechyd meddwl eilaidd yng Nghonwy yn parhau i fod yn heriol o amgylch y rhyngwyneb gyda Bwrdd Iechyd Prifysgol Betsi Cadwaladr.

Cafodd hyn ei ddwysáu yn ystod y cyfnod o fesurau arbennig mae’r Bwrdd Iechyd yn destun iddo a’i strwythurau staff dros dro.

Mae materion lluosog ynghylch amrywiad mewn gweithdrefnau mynediad a rheoli – o wahanol fodelau o Wasanaethau Triniaeth yn y Cartref a mynediad i welyau cleifion

Mae cofnodi a chyfathrebu cofnodion cleifion hefyd wedi bod yn faes pryder a dylai’r system TG Iechyd a Gofal Cymdeithasol integredig yn y dyfodol helpu hyn. .

Mae gwaith sylweddol wedi cael ei wneud i sicrhau bod prosesau comisiynu cadarn bellach yn cael eu hymgorffori mewn ymarfer gan sicrhau bod gostyngiad yng ngorwariant presennol y gyllideb Gofal Cymdeithasol wrth symud ymlaen.

Mae gwasanaeth Pobl Ddiamddiffyn Gofal Cymdeithasol yn gweithio gyda’r tîm Gofal Iechyd Parhaus o fewn y Bwrdd Iechyd i ddatblygu protocol Adran 117 a fydd yn penderfynu ar lefelau priodol y cyllid a fydd yn cael ei ddosrannu i’r ddwy ochr.

Yn dilyn codiad yn y nifer o achosion o hunanladdiad dros y cyfnod yn arwain at 2015, amlygodd adolygiad digwyddiad critigol bryderon difrifol.

Mewn ymateb i’r pryderon, sefydlwyd cyfarfod gwelliant rheolaidd ar y cyd ar gyfer rheolwyr o fewn Iechyd a Gofal Cymdeithasol sydd wedi creu newidiadau cadarnhaol o ran goruchwylio a chynefino.

Fodd bynnag, mae materion sylfaenol a systemig yn parhau i fod yn rhwystr sy’n atal i wasanaethau iechyd meddwl eilaidd weithio gystal ag y gallant ar hyn o bryd.

Newidiadau i ofynion adrodd

Mae’r Ddeddf newydd wedi cyflwyno newidiadau mawr o’r wybodaeth am berfformiad a gasglom mewn gofal cymdeithasol. Bydd rŵan yn ofynnol i ni adrodd ar 5 adran gwybodaeth sy’n ymwneud a gofal cymdeithasol oedolion:

Mesurau perfformiad sy’n ystyried pethau fel bodloni amserlenni statudol
Asesiadau – y nifer o bobl rydym yn asesu ar wahanol gyfnodau
Gwasanaethau
Ffioedd
Diogelu

Mae 4 adran sy’n mynd i’r afael â gofal cymdeithasol i blant:

Mesur Perfformiad
Gofal a Chymorth
Asesiadau
Amddiffyn Plant

Mae’r heriau y mae hyn yn creu yn cynnwys gwneud yn siŵr ein bod yn cofnodi’r holl wybodaeth sydd ei hangen i gasglu’r setiau data hyn, ysgrifennu adroddiadau newydd i dynnu’r wybodaeth gywir o’n cronfa ddata, a phrofi, er mwyn sicrhau bod y data’n gadarn. Ynghyd â hyn, rydym yn ymgynghori â budd-ddeiliaid allweddol er mwyn sicrhau eu bod yn gwybod am ac yn deall y newidiadau.

Rydym hefyd yn trafod gyda’n cydweithwyr pa rai o’r hen fesurau y gallwn eu gadael ar ôl, pa rai mae angen i ni eu cadw, a pha un o’r rhai newydd y bydd angen i ni dyrchu am wybodaeth bellach, i gyfoethogi ein gwybodaeth.

Mae hefyd agwedd ansoddol i’r wybodaeth a gesglir, a bydd angen adnoddau sylweddol i gydlynu.

Heriau dros y flwyddyn i ddod ar gyfer Cymorth i Deuluoedd ac Ymyrraeth

Gyda gweithrediad y SSWBA, mae’r gwasanaeth Cymorth i Deuluoedd ac Ymyrraeth (FS&I) yn wynebu’r her sylweddol o annog adnoddau presennol i gydymffurfio ag egwyddorion y ‘rhaglen ataliol’. Mae atal yn y lle cyntaf yn cyfeirio at yr heriau a gyflwynir o ran grymuso teuluoedd i wneud newidiadau i ddechrau trwy Gwybodaeth, Cyngor a Chymorth ac er na fydd FS&I o reidrwydd yn arwain ar y gwasanaethau hyn bydd rhyngwyneb pwysig i’w ddatblygu gydag asiantaethau partner, yn enwedig y Tîm o Amgylch y Teulu (TAF), Cyfiawnder Ieuenctid, Addysg ac Iechyd.

Pan fydd teuluoedd yn bresennol gydag anghenion a aseswyd sydd angen gofal a reolir, bydd yn rhaid i FS&I ddarparu pecynnau gofal a chymorth effeithiol gyda’r nod o hwyluso newid a dilyniant gyda chanlyniadau clir sy’n seiliedig ar ganlyniadau gan atal gwaethygiad drwy’r gwasanaethau i ymyriadau ‘pen uchaf’ drwy’r achosion amddiffyn plant a gofal.

Pan fydd achosion gofal yn ymddangos yn anochel, mae FS & I wedi ymrwymo i archwilio pob opsiwn i leoli plant mewn amgylchedd teuluol yn gyntaf oll gyda theulu a ffrindiau a dim ond pan nad yw hyn yn bosibl drwy Ofal Maeth a mabwysiadu.

Er mwyn ymateb yn effeithiol i’r newidiadau mewn deddfwriaeth a chodau ymarfer, bydd angen i’r gwasanaeth adolygu adnoddau presennol yn fewnol a datblygu gweithlu medrus i ateb yr her a hyrwyddo egwyddorion atal a grymuso. Gan gynnwys yn y cynllun gwasanaeth i gyflawni newid:

Datblygu prosesau asesu syml a chymhleth yn lleol a chyfrannu at ddatblygiadau rhanbarthol a chenedlaethol
Gweithredir pecynnau Gofal a Chymorth yn ôl angen a asesir
Adolygu’r strwythur presennol i sicrhau bod y gweithlu’n cael ei defnyddio’n effeithiol i gwrdd ag anghenion y plant a’u teuluoedd i wneud y mwyaf o gyfleoedd ar gyfer newid cadarnhaol
Gwella sgiliau’r gweithlu i ddarparu ymyriadau effeithiol a gweithio gyda theuluoedd drwy ymagweddau sy’n seiliedig ar ganlyniadau a phartneriaeth
Datblygu offer cyfranogi i sicrhau bod llais y cwsmer yn cael ei glywed ac yr ymatebir iddo ac yn gallu llywio arfer a darpariaeth gwasanaeth
Datblygu fforymau partneriaeth gydag asiantaethau partner er mwyn cryfhau gwaith integredig
Gwerthuso ac adolygu effeithiolrwydd y gwasanaeth ac ymyriadau yn barhaus

Mae’n anochel mai’r her fwyaf sylweddol ar gyfer gweithlu gofal cymdeithasol fydd creu’r gallu i gymryd yr amser am seibiant o amserlenni gwaith bob dydd, i fyfyrio ac ystyried mentrau arferion newydd i ymateb i anghenion y defnyddwyr gwasanaeth o fewn tirlun sy’n newid. Fel gwasanaeth sy’n esblygu mae angen i ni gymryd cyfrifoldeb ar y cyd i sicrhau y gellir hwyluso’r elfen hon o’r datblygiad drwy fodelau goruchwyliaeth, diwrnodau tîm a chyfleoedd datblygu gwasanaethau.

Staffio – defnyddio adnoddau presennol

Pob Gwasanaeth Anabledd Rheng Flaen

Mae recriwtio staff addas yn fwyfwy o broblem ar gyfer swyddi cymorth cymunedol rheng flaen, gydag ychydig iawn o ymgeiswyr am swyddi a hysbysebwyd.

Adlinio’r Gwasanaeth Anabledd

Adlinio’r timau, rheoli newid, ansicrwydd i staff, rhoi cyfrif am ddewisiadau staff ac ymdrechu i gyflawni hyn ar eu cyfer yn deg ar draws y gwasanaeth.

Sicrhau bod y gweithlu wedi’u hyfforddi i gyflawni’r Ddeddf

Gallu hyfforddwyr ar y fframwaith hyfforddi genedlaethol i hyfforddi’r gweithlu yng Nghonwy.

Dysgu a Datblygu Rhanbarthol

Mae Llywodraeth Cymru yn ceisio sicrhau un cynllun Dysgu a Datblygu ar gyfer rhanbarth gyfan Gogledd Cymru, drwy Bartneriaeth Datblygu’r Gweithlu Gofal Cymdeithasol (SCWDP).

Trefniadau Diogelu Rhag Colli Rhyddid

Daeth Trefniadau Diogelu rhag Colli Rhyddid yn gyfraith ar 1 Ebrill 2009. Eglurodd Dyfarniad y Goruchaf Lys ar 19 Mawrth 2014 y trothwy Trefniadau Diogelu rhag Colli Rhyddid. Mae’r meini prawf wedi lleihau’n fawr, sydd wedi effeithio ar allu Conwy i fodloni ei ofynion cyfreithiol statudol. Effaith y dyfarniad yw bod bellach rhestr aros o 337 o bobl yn aros am asesiadau Diogelu Rhag Colli Rhyddid. Disgwylir i nifer y bobl yr amcangyfrifir eu bod angen asesiad Diogelu Rhag Colli Rhyddid gynyddu’n raddol o flwyddyn i flwyddyn yn unol â thueddiadau demograffig.

Mae Conwy wedi ymateb trwy hyfforddi deuddeg o weithwyr proffesiynol Gwaith Cymdeithasol / Therapi Galwedigaethol i gynnal asesiadau. Mae’n rhaid i bob asesydd gynnal un asesiad y mis, mae hyn yn ychwaneg i’w llwyth achosion arferol ac mae’n cynnwys chwe asesiad unigol fesul pob defnyddiwr gwasanaeth. Mae tri Asesydd Lles Gorau parhaol yn derbyn hyfforddiant ym Mhrifysgol Caer. (yn Graddio ym mis Mai 2016). Mae’r Aseswyr hyn yn ymroddedig i’r gwasanaeth Diogelu Rhag Colli Rhyddid.

Ni ellir diwallu gofynion cyfreithiol newydd y gyfraith achosion yn y tymor byr oherwydd diffyg adnoddau ac mae hyn yn gadael yr adran agored i her ymgyfreitha gan deuluoedd ac oddi wrth bobl sydd wedi cael eu hamddifadu o’u rhyddid heb i unrhyw fesurau diogelu cyfreithiol gael eu gweithredu.

Deddf Gwasanaethau Cymdeithasol a Lles

O dan y Ddeddf newydd, bydd yn her i sicrhau dull cyfiawn a theg i’r bobl hynny sydd wedi bod yn derbyn gwasanaethau ers peth amser, ac yn ogystal, rhai a fydd yn dod yn ddefnyddwyr gwasanaeth newydd ar ôl mis Ebrill.

Heriau Ariannol

Gostyngiad yn y grant Teuluoedd yn Gyntaf a’r Grant LAP ar gyfer Dechrau’n Deg

Bu gostyngiad o 11.7% yn y grant ar gyfer 2016-17 sy’n arwain at golli rhywfaint o wasanaethau (Swyddog Cyfranogiad dan ymgynghoriad) ynghyd â gostyngiad yn y grant o dan CLG ar gyfer cyflawni allanol. Mae hwn yn gyfnod heriol i Gwaith Amdani / Teuluoedd Gwledig yn Gyntaf.

Mae’r toriad yn y LAP (grant Chwarae ac Iaith) yn arwain at golli athro gwych sydd ar hyn o bryd yn gwneud y gwaith hwn ar ran Dechrau’n Deg.

Gwasanaethau Teg

Mae cael timau wedi eu hadlinio i greu Gwasanaeth Anabledd, y dyraniad adnoddau anghyfartal yn parhau i fod yn her yn enwedig rhwng pobl ag Anableddau Corfforol a / neu nam ar y synhwyrau a phobl ag Anableddau Dysgu.

Rheoli Adnoddau

Mae’r gyllideb Gofal Cymdeithasol yn wynebu heriau na welwyd o’r blaen. Mae mwy o alw ar draws pob maes gwasanaeth a arweiniodd at orwariant o dros £1 miliwn wrth gau’r cyfrifon ar gyfer 2015/16.

Mae amrywiaeth o ffactorau wedi achosi hyn, adroddwyd ar lawer ohonynt drwy’r broses wleidyddol yn 2015/16. Fodd bynnag, effeithiodd ystod o gostau ychwanegol ymhellach ar y canlyniad cyffredinol ar gyfer 2015/16. Roedd yr adran yn ystod misoedd olaf 2015/16 wedi rhagweld y cynnydd yn y gorwariant ac roedd y cyfle i ddefnyddio’r cronfeydd wrth gefn yn ateb.

Mae cyllideb 2016/17 dan bwysau pellach, gan fod rhaid iddo gytuno ar gyllid ychwanegol ar gyfer y sector gofal preswyl, cartref a byw â chymorth (24/7) hyd at £0.75m, yn ychwanegol at y cyllid sydd ar gael drwy achosion busnes. Effeithir ymhellach ar y prosiectau byw â chymorth (24/7) yn sgil cyflwyno’r Cyflog Byw Cenedlaethol (CBC). Mae’n amlwg bod y penderfyniad polisi a gymerwyd yn genedlaethol i gyflwyno’r CBC wedi cael canlyniadau ariannol sylweddol yn lleol. Fodd bynnag, nid yw hyn yn unigryw i Gonwy.

Yn ogystal, bu cynnydd yn y galw am leoliadau annibynnol ar gyfer Plant sy’n Derbyn Gofal (LAC), gyda’r sector annibynnol sy’n ceisio sicrhau cynnydd mewn ffioedd o ganlyniad i’r Cyflog Byw Cenedlaethol. Mae’r ddau ffactor yma yn creu pwysau ychwanegol ar y gyllideb a rhagwelir gorwariant.

O ran Plant sy’n Derbyn Gofal, mae’r pwysau’n ganlyniad i ddiffyg argaeledd lleoliadau maeth yn y sir ac o fewn darparwyr annibynnol ar draws y rhanbarth. Oherwydd y diffyg hwn o ddewis o leoliadau, mae weithiau angen rhoi rhai pobl ifanc mewn lleoliadau preswyl cost uwch, yn enwedig lle mae ymddygiad yn gwaethygu ac na all Gofalwyr Maeth ddiwallu eu hanghenion. Derbynnir y bydd cyflwyno’r Cyflog Byw Cenedlaethol, gobeithio, yn mynd i’r afael â rhai o’r materion recriwtio a chadw staff yn y sector ac yn ei gwneud yn sector mwy deniadol i weithio ynddi. Yn ei dro, gobeithio y bydd hyn yn cynorthwyo gyda’r ymdrech i wella ansawdd a chynaliadwyedd. Fodd bynnag, arweiniodd y gwahaniaeth rhwng yr achosion busnes a gytunwyd a’r cyllid sydd ei angen ar gyfer y Cyflog Byw Cenedlaethol at ddiffyg ynddo’i hun.

Mae’r adran wedi elwa o gyllid ychwanegol drwy’r llwybr achosion busnes at y swm o £6.2 miliwn dros y 5 mlynedd diwethaf ac wedi cyflawni arbedion effeithlonrwydd o £9.4 miliwn fel rhan o ymgyrch effeithlonrwydd cynghorau dros yr un cyfnod.

O 1 Ebrill 2016 mae arbedion effeithlonrwydd gwerth £1.436 miliwn a gymeradwywyd gan y Cyngor ar gyfer 2016/17 wedi cael eu tynnu oddi ar y gyllideb. Bydd methiant i gyflawni unrhyw un o’r mentrau hyn ond yn cynyddu gorwariant yr adran ymhellach.

Bydd y sefyllfa’n gwaethygu yn 2017/18 gyda chynnydd pellach a’r galw a ddisgwylir o fewn y gwasanaeth. Y senario waethaf bosibl o ran y Cyflog Byw Cenedlaethol yw y bydd yn codi i £9.00 yr awr ym mis Ebrill 2017 a fyddai’n gosod galwadau ychwanegol o £2.3 miliwn ar gyfer Cartrefi Preswyl / Nyrsio, £1.05 miliwn am Ofal Cartref a £1.2 miliwn ar gyfer Byw â Chymorth. Mae hyn yn ychwaneg i’r diffyg adnoddau posibl ar gyfer 2016/17 a fydd yn cael ei ddwyn ymlaen a bydd y sector gofal yn profi pwysau pellach o ganlyniad i fentrau eraill y cyngor.

Heriau Presennol

Mae Deddf Gwasanaethau Cymdeithasol a Lles (Cymru) 2014 yn parhau i fod yn gymhelliant mawr dros newid. Llwyddodd ein rhaglen drawsnewid i ailddiffinio ein strwythurau gwasanaeth i’w halinio’n well i gwrdd ag anghenion y Ddeddf, ac rydym rŵan ar bwynt lle mae gwasanaethau sefydledig yn ceisio gwneud y gorau neu gydbwyso eu hadnoddau yn erbyn y galw, ac mae gwasanaethau newydd yn datblygu modelau gwaith effeithiol, sy’n briodol i anghenion pobl.

Gellir grwpio ein heriau presennol mewn pedwar categori:

Heriau ariannol yn erbyn y galw newydd
Staffio – defnyddio adnoddau presennol
Mentrau arfer newydd
Datblygu Polisi