Beth mae ein Harolwg Dinasyddion wedi’i ddweud wrthym
Pobl yn dweud eu bod wedi derbyn yr wybodaeth a’r cyngor cywir pan roeddynt ei angen
Roedd 72% o ofalwyr, 77% o blant a 79% o oedolion yn cytuno gyda’r datganiad hwn. Nid oedd rhai pobl yn siŵr beth oedd ar gael iddynt ac felly nid oeddent yn teimlo y gallant ofyn y cwestiynau cywir. Roedd eraill yn ei chael yn anodd cael mynediad i wybodaeth ac yn teimlo y byddant yn manteisio o gyswllt amlach a mwy cyson gyda ni pan fydd eu cynllun gofal a chymorth ar waith.
Pobl yn dweud eu bod yn cael eu trin ag urddas a pharch
Roedd 98% o ofalwyr, 80% o blant a 93% o oedolion yn cytuno eu bod yn cael eu trin ag urddas a pharch gan staff Gofal Cymdeithasol.
Mae gen i dîm gwych o ofalwyr sydd bob amser yn glên a gofalus ohonof
Bob amser, ac mae dealltwriaeth ein gweithwyr cymdeithasol wedi gwneud y broses o ofalu yn haws.
Pobl sydd â chynllun gofal a chymorth yn dweud eu bod wedi cael gwybodaeth ysgrifenedig am eu gweithiwr penodedig yn y gwasanaethau cymdeithasol
Mae 83% o ofalwyr, 85% o blant a 81% o oedolion yn cytuno eu bod yn gwybod pwy i gysylltu â nhw am eu gofal a chefnogaeth, ond, mae sylwadau ychwanegol yn datgelu bod rhai yn teimlo rhwystredigaeth gyda’r broses o gael cefnogaeth ac yn teimlo eu bod yn cael eu pasio o un adran i’r llall. Nododd rhai gofalwyr pa mor werthfawr oedd aelodau staff penodol wrth gefnogi eu dyletswyddau gofalu a gwahaniaeth mor gadarnhaol y mae wedi’i wneud i’w bywydau.
Cymorth gyda gofal seibiant yw’r unig beth sydd wedi ein cadw yn gall a’n galluogi i fynd ar wyliau gyda theulu a ffrindiau heb boeni – cefnogaeth ardderchog, Diolch.
Pobl yn rhoi gwybod eu bod yn teimlo yn rhan o unrhyw benderfyniadau ynglŷn â’u gofal a chymorth
Roedd 81% o ofalwyr, 76% o blant a 76% o oedolion yn cytuno, gydag ymatebwyr o bob grŵp yn nodi bod hwn yn gyfrifoldeb ar y cyd, neu ar ran aelodau eraill o’r teulu.
Pobl sydd yn fodlon gyda’r gofal a chymorth y maent wedi’i dderbyn
Roedd 70% o ofalwyr, 78% o blant a 87% o oedolion yn fodlon gyda’r gofal a chymorth y maent wedi’i dderbyn gan Gonwy. Mae’r sylwadau ychwanegol a gafwyd yn arddangos ystod o safbwyntiau; hoffai rhai gael mwy o gefnogaeth ond yn cydnabod bod adnoddau yn gyfyngedig. Roedd eraill yn gwerthfawrogi bod angen cefnogaeth ar gyfer eu llesiant ac yn canmol y staff oedd ynghlwm â’u gofal.
Os oes un peth roeddwn yn hapus gydag o, y merched oedd yn gofalu amdanaf oedd hynny, roedd pob un ohonynt yn A1.
Mae’n bwysig i ni bod pobl sy’n cael gofal a chefnogaeth yng Nghonwy yn cael eu trin ag urddas, parch a charedigrwydd, felly mae’n bleser derbyn adborth a diolch gan ddefnyddwyr gwasanaeth a’u teuluoedd sy’n cadarnhau hyn. Mae ein tîm ailalluogi Pobl Hŷn yn derbyn llythyrau a chardiau yn rheolaidd sy’n dangos y rhyddhad a’r gwerthfawrogiad bod gofal o ansawdd yn cael ei ddarparu. Dyma rai enghreifftiau o’r sylwadau a gafwyd:
Roedd fy ngwraig yn gwerthfawrogi’r modd cyfeillgar, proffesiynol ac ymroddedig y gwnaeth [y gofalwyr] eu dyletswyddau …….hoffwn innau hefyd ddiolch i’r merched am dawelu unrhyw bryder oedd gennym, gan fod y rhain yn brofiadau newydd i ni.
Roedd gan y staff berthynas hyfryd gyda fy mam a gwnaethant ddiwallu ei hanghenion gyda chyfeillgarwch a chynhesrwydd …..hoffwn i chi wybod pa mor werthfawr yw’r gwasanaeth hwn i bobl fel fy niweddar fam a gofynnaf i chi basio ein gwerthfawrogiad i’r tîm bendigedig o staff gofal a wnaeth eu gorau iddi.
Hoffwn ddiolch yn fawr i bob dynes ddaeth ataf yn ystod fy nghyfnod gofal o chwech wythnos. Roeddech i gyd mor hyfryd a charedig, ni fyddwn wedi gallu ymdopi heboch chi. Rwy’n eich caru chi i gyd.
Perfformiad Arall
Nid oedd 81% o oedolion a gafodd gyngor a chefnogaeth gan y gwasanaeth gwybodaeth, cyngor a chymorth angen cysylltu â’r gwasanaeth eto o fewn 6 mis. Rydym yn falch o’r llwyddiant hwn gan ein bod yn sylweddol uwch na Chyfartaledd Cymru gyda’r canlyniad hwn. (PMA23)
Gwnaethom gwblhau 100% o asesiadau ar gyfer plant o fewn y graddfeydd amser statudol (PMC24)
Rhaglen Timau Adnoddau Cymunedol
Rydym wedi bod yn gweithio’n agos gyda’n partneriaid i gynllunio ar gyfer y dyfodol ac ystyried ffyrdd o wella ein hygyrchedd i ddinasyddion ledled Conwy. Rydym yn bwriadu sefydlu Timau Adnoddau Cymunedol a fydd yn cynnwys timau o weithwyr proffesiynol, yn gweithio mewn cymunedau i ddarparu cefnogaeth iechyd, lles a gofal cymdeithasol i ardaloedd dynodedig.
Cynhaliwyd digwyddiadau ymgysylltu i drafod sut y gall timau amrywiol weithio mewn ffordd mwy integredig a sicrhau bod y model gwasanaeth newydd yn addas ar gyfer ei bwrpas ac yn gynaliadwy yn y dyfodol. Mae adborth wedi tynnu sylw at themâu ailadroddus mewn perthynas â thechnoleg gwybodaeth, yr angen am gydlyniad a chyfathrebu lleol, symleiddio prosesau cyfredol a phwysigrwydd defnyddio arbenigedd y staff cywir ym mhob lleoliad.
Amcanion y Rhaglen Tîm Adnoddau Cymunedol yw sicrhau:
- Model darparu gwasanaeth iechyd a gofal cymdeithasol integredig ar gyfer bob cymuned
- Gwasanaethau wedi’u cydlynu ac yn canolbwyntio ar y person ar gyfer pob dinesydd sydd eu hangen
- Gwaith partneriaeth ynghylch yr unigolyn
- Agwedd ataliol i wneud y gorau o annibyniaeth a gwytnwch
- Model gwaith effeithlon ac integredig
- Gwasanaethau sy’n gweithredu 24 awr y dydd, 7 niwrnod yr wythnos
Bydd gwaith yn parhau i archwilio’r cyfleoedd i adeiladu ar y trefniadau gwaith partneriaeth cyfredol a sefydlu’r model gwaith mwyaf effeithiol. Yn syml, dylai edrych fel y model hwn ar y dde:
Sgyrsiau sy’n Canolbwyntio ar Ganlyniadau
Mae sgyrsiau seiliedig ar ganlyniadau yn ganolog i brosiect arbrofol yng Ngwasanaeth Plant a Theuluoedd Conwy ac eisoes wedi’i sefydlu yn y Gwasanaeth Pobl Hŷn. Pwrpas y prosiect arbrofol yw archwilio cyfleoedd a heriau gweithredu ffocws ar ganlyniadau personol a theuluoedd.
Mae agwedd seiliedig ar ganlyniadau yn dechrau trwy dreulio amser yn deall beth sy’n bwysig i’r unigolyn a’u teulu. Mae hyn yn annog sefydliadau i symud oddi wrth agweddau a arweinir gan wasanaethau a’u herio i feddwl mewn modd sy’n canolbwyntio ar y person. Ni ellir cyflawni canlyniadau trwy ddarparwr gwasanaeth sengl bob amser. Mae elfennau cadarnhaol yr agwedd hon yn cynnwys gwelliannau mewn perthnasau rhwng gweithwyr cymdeithasol a defnyddwyr gwasanaeth, a materion craidd yn cael eu nodi mewn modd newydd, a defnyddwyr gwasanaeth yn teimlo eu bod yn cael eu cynnwys a’u grymuso i wneud penderfyniadau am eu dyfodol.
Mae’r agwedd hon yn cydnabod bod canlyniadau yn cael eu cyflawni o fewn rhwydwaith ehangach y teulu, y gymuned leol a systemau gofal Cymdeithasol.
Mae’r adborth wedi bod yn gadarnhaol:
Pan oeddwn yn cwffio gyda fy mrawd byddai hi [Gweithiwr Cymdeithasol] yn siarad gyda mi ac yn fy mhwyllo. Ceisiodd hefyd fy helpu cymaint â phosibl, a gwrando arnaf.
Mae hi [Gweithiwr Cymdeithasol] yn fy mhwyllo pan fyddaf yn ei gweld hi. Mae’n hawdd siarad gyda hi hefyd. Mae hi wir wedi ein helpu.
Rydym yn cydnabod y bydd yn cymryd amser i weithredu’r newid agwedd hwn. Bydd hefyd yn gofyn am drafodaethau medrus i gael cydbwysedd rhwng darparu gofal a diogelu rhag niwed, tra’n parchu’r gwahanol aelodau o’r teulu.
I’r dyfodol, y nod yw i unigolion ymgysylltu â’r canlyniadau sy’n bwysig, tra bod ymarferwyr yn gweithio tuag at newidiadau cynaliadwy. Gobeithir y bydd yr agwedd hon yn arwain at leihad mewn atgyfeiriadau, lleihad mewn llwyth achosion a lleihad yn nifer y plant sydd dan ofal neu ar y Gofrestr Diogelu Plant. Yn seiliedig ar yr effaith, bydd cyflwyniad parhaus yn y Gwasanaeth Pobl Hŷn a’r holl wasanaethau eraill yn 2018-19.
Tîm Ymylon Gofal
Yng Nghonwy rydym yn ceisio cefnogi teuluoedd i gadw pobl ifanc yn ddiogel, gartref, ac atal plant a phobl ifanc rhag gorfod mynd i’r system ofal. Mae ein Tîm Ymylon Gofal wedi’i greu i helpu i atal rhwyg mewn teuluoedd, lleihau’r angen i dderbyn plant i ofal a gwella profiadau plant sydd eisoes dan ofal. Trwy ddarparu cefnogaeth ddwys ac ymarferol i’r teulu yn eu hamgylchedd cartref, mae gwaith y tîm yn canolbwyntio ar anghenion unigol y teulu ac yn mabwysiadu agwedd integredig i osgoi argyfwng yn y cartref. Mae staff yn brofiadol ac wedi’u hyfforddi i safon uchel i gydbwyso’r angen am ymyrraeth uniongyrchol ac wedi’i dargedu, ac mae gweithio gyda theuluoedd ar nodau tymor hir yn ceisio datblygu sgiliau datrys problemau, gwella gwytnwch a chyflawni newid ymddygiad cadarnhaol a chynaliadwy.
Mae’r tîm yn gweithio ochr yn ochr â thimau ac asiantaethau eraill fel y Tîm o Amgylch y Teulu, y Gwasanaeth Camddefnyddio Sylweddau, Tai, gwasanaethau iechyd meddwl oedolion, ac eraill, i sicrhau bod ymyraethau mor effeithiol â phosibl.