Comisiynu
Rydym newydd gynhyrchu ein strategaeth gomisiynu sy’n nodi sut y bydd Gofal Cymdeithasol Conwy yn cydweithio gyda dinasyddion, staff, cymunedau, gwirfoddolwyr a phartneriaid i gomisiynu gwasanaethau sy’n darparu canlyniadau, gwell iechyd a lles, gweithlu y gofalir amdanynt a gwell gwerth am arian. Mae’n ceisio darparu’r hyn sy’n bwysig i ddinasyddion a rhoi dewis a rheolaeth iddynt dros eu bywydau, yn ogystal â chyflawni ein gweledigaeth, “cydweithio gyda’n cymunedau i sicrhau bod pawb yn gallu cael y gorau allan o fywyd”.
Mae’n rhaid i ni newid y modd y byddwn yn comisiynu a gweithio, gan fod galw cynyddol ar wasanaethau a bod anghenion dinasyddion yn dod yn fwy cymhleth. Mae’n rhaid i ni ddarparu gwasanaethau lleol, o ansawdd gyda llai o adnoddau.
Rydym wedi datblygu wyth amcan strategol a’n cynllun comisiynu, sy’n nodi beth yr ydym yn bwriadu ei ddarparu dros y tair blynedd nesaf. Rydym wedi eu seilio ar y Nodau Pedwarplyg, a nodwyd yn yr Adolygiad Seneddol o Ofal Cymdeithasol (Ionawr 2018), ac ymchwil, data a’r hyn y mae dinasyddion a phartneriaid wedi’i ddweud wrthym trwy Sgwrs y Sir ac ymgynghoriad.
Amcanion Strategol
Amcan Strategol 1 – Canolbwyntio ar ganlyniadau lles
- Byddwn yn canolbwyntio ar ganlyniadau gan ddefnyddio’r canlyniadau llesiant cenedlaethol (Adran 10) a byddwn yn parhau i weithio tuag at gynnwys y rhain ym mhob agwedd o’n gwaith a chefnogi darparwyr i wneud yr un fath.
- Mae’r canlyniadau hyn yn cynnwys cyfrifoldebau y bydd y dinasyddion eu hunain yn ymgymryd â nhw i’w helpu i gyflawni eu llesiant eu hunain.
- Mae’r Iaith Gymraeg a’n cynnig gweithredol yn sylfaenol i ddarparu’r canlyniadau hyn.
Amcan Strategol 2 – Atal
- Rydym eisiau i ddinasyddion fod yn iach, aros yn iach am hirach ac atal neu oedi eu hangen am ofal a chefnogaeth.
Amcan Strategol 3 – Ymyrraeth gynnar
- Byddwn yn cydweithio i nodi meysydd ar gyfer ymyrraeth gynnar a gweithredu cyn gynted â phosibl fel bod dinasyddion yn aros yn annibynnol, bod teuluoedd yn wydn a bod anghenion plant yn lleihau.
Amcan Strategol 4 – Cydweithio
Byddwn yn cydweithio:
- Gydag unigolion, teuluoedd a chymunedau gan ddefnyddio agwedd wedi’i chyd-gynllunio a’i chyd-gynhyrchu fel y bydd gan ddinasyddion fwy o farn, dewis a rheolaeth. Sicrhau ymglymiad cyfartal.
- Gydag ystod eang o bartneriaid a phartneriaid corfforaethol yn genedlaethol, rhanbarthol a lleol i ddatblygu modelau newydd o ofal a gwneud defnydd gorau o lywodraethu ac adnoddau ar y cyd.
- Defnyddio cryfderau cymunedol cyfredol i greu cymunedau cryfach, mwy cynaliadwy.
- Canolbwyntio ein darpariaeth ar lefel leol fel bod anghenion dinasyddion yn cael eu diwallu yn lleol, rŵan ac yn y dyfodol.
- Trwy ddefnyddio ffyrdd arloesol o gynnwys dinasyddion, yn enwedig y rhai anodd i’w cyrraedd.
- Datblygu perthnasau da gyda’n holl bartneriaid a dysgu gyda’n gilydd.
Amcan Strategol 5 – Deall ein cwsmeriaid, ein gweithlu a’n marchnadoedd
- Byddwn yn parhau i ddefnyddio ystod eang o ddata a gwybodaeth i ddatblygu arferion seiliedig ar dystiolaeth fel ein bod yn adnabod ein dinasyddion, ein gweithlu a’r marchnadoedd yr ydym yn gweithio gyda nhw rŵan ac yn y dyfodol.
- Bydd y gweithlu gofal wedi’u hymgysylltu, eu cefnogi, eu hyfforddi ac ag agwedd o welliant parhaus. Rydym eisiau i Gofal Cymdeithasol yng Nghonwy fod yn lle gwych i weithio.
- Bydd sefydlogrwydd a chynaladwyedd y farchnad yn sylfaenol i’r gwaith yr ydym yn ei wneud a byddwn yn datblygu ein hagwedd at siapio’r farchnad, cyflenwi a’r galw am wasanaethau fel y gallwn ddatblygu ffyrdd arloesol o weithio i ddiwallu anghenion lleol a datblygu cadwyni cyflenwi moesol.
Amcan Strategol 6 – Mae dinasyddion yn ddiogel
- Bydd diogelu yn cael ei integreiddio ym mhopeth yr ydym yn ei wneud, fel y gall ddinasyddion fyw yn rhydd rhag niwed, camdriniaeth ac esgeulustod.
- Bydd y gwasanaethau rydym yn eu comisiynu yn ddiogel.
- Mae arferion cyflogaeth moesegol yn ein gwasanaethau a gomisiynwyd yn bwysig a byddwn yn gweithio gyda’n darparwyr i sicrhau bod ein holl arferion yn foesegol o fewn ein cadwyn gyflenwi mewn perthynas â chaethwasiaeth fodern, cam-drin hawliau dynol ac arferion cyflogaeth anfoesegol. Mae gan Gomisiynu hefyd ran allweddol i’w chwarae wrth ddweud NA i gaethwasiaeth fodern.
Amcan Strategol 7 – Ansawdd a gwerth am arian
- Bydd ansawdd hefyd wedi’i integreiddio ym mhopeth a wnawn.
- Rydym wedi ymrwymo i sicrhau darpariaeth gwasanaethau a gofal o ansawdd uchel, pwy bynnag sy’n ei ddarparu.
- Byddwn yn comisiynu gwasanaethau o ansawdd uchel ac wedi’u personoleiddio a byddwn yn gwirio ansawdd ein gwasanaethau, profiadau dinasyddion a chynllun gwella ansawdd fel ein bod yn dysgu a gwella yn barhaus.
- Bydd gennym agwedd wedi’i thargedu at ddefnyddio adnoddau a byddant yn cael eu defnyddio yn effeithlon ac effeithiol a byddwn yn canfod a dileu gwastraff a fydd yn moderneiddio ein hagwedd at gomisiynu.
- Byddwn yn dechrau edrych ar y Gwerth Cymdeithasol y gallwn ei greu trwy wasanaethau sy’n cael eu darparu a’r effaith y maent yn ei gael ar ein cymunedau.
Amcan Strategol 8 – Technoleg
- Byddwn yn datblygu ymhellach ein defnydd o dechnoleg arloesol, er enghraifft trwy ymestyn teleofal/technoleg gynorthwyol/teleiechyd i wella ein gwasanaethau, i gynnal/hyrwyddo annibyniaeth unigolion a lleihau’r angen am ofal a chefnogaeth uniongyrchol.
- Byddwn yn archwilio lle y gallwn weithio yn fwy effeithlon ac effeithiol gan ddefnyddio technoleg, gan ganolbwyntio ar awtomatiaeth yn fewnol a gyda’n darparwyr.
Sut fyddwn ni’n gwybod pa mor effeithiol rydym yn comisiynu?
- Gan fod y strategaeth gomisiynu yn ceisio cyflawni canlyniadau i ddinasyddion Conwy, bydd yn cyfrannu at ddarpariaeth y canlyniadau llesiant, a bydd y rhain yn cael eu defnyddio fel mesurau i asesu llwyddiant y strategaeth, ochr yn ochr â darpariaeth ein wyth amcan strategaeth a’n cynllun comisiynu.
- Yn flynyddol, byddwn yn rhoi gwybod sut bydd ein dinasyddion yn diwallu’r canlyniadau llesiant hyn.
- Bydd y strategaeth gomisiynu yn cael ei hadolygu ar ôl tair blynedd, neu’n gynt os oes angen gwneud newidiadau.
- Bydd y cynllun comisiynu yn cael ei fonitro yn flynyddol a rhoddir gwybod i’r Pwyllgor Craffu Gofal Cymdeithasol ac Iechyd.