Mae blwyddyn gynhyrchiol arall wedi mynd heibio ac mae tîm Gofal Cymdeithasol Conwy yn sicr wedi bod yn brysur. Y prif ddatblygiad ar gyfer Gofal Cymdeithasol yng Nghymru oedd gweithredu Deddf Gwasanaethau Cymdeithasol a Llesiant (Cymru) ym mis Ebrill 2016, ac roedd Conwy mewn sefyllfa dda i ddiwallu dyletswyddau a gofynion ymagwedd wahanol tuag at ddarpariaeth.
Mae’r cysyniad o ganolbwyntio ar ganlyniadau, lles a lleihau rhwystrau at wasanaethau wrth wraidd ein hail-ddyluniad, a phedair blynedd yn ddiweddarach, rwy’n falch o weld bod rhai o’r llwyddiannau hyn i’w gweld, megis y gwasanaeth Lles Cymunedol sydd wedi gweld ystod arloesol o brosiectau cymunedol yn cael eu cefnogi ar gyfer oedolion hŷn, ac mae hyn wedi cael ei gydnabod fel arfer da ac fe fydd yn cael ei ddangos yng Nghynhadledd Gwasanaethau Cymdeithasol 2017. Mae’r Gwasanaethau Anabledd i bob oedran wedi cael ei sefydlu, ac o dan arweinyddiaeth ofalus y rheolwr gwasanaeth, mae wedi datblygu i dîm sy’n ffynnu sydd yn canolbwyntio ar ganlyniadau clir i bawb sydd ag anabledd. Mae alinio Gofal Cymdeithasol ac Addysg wedi datblygu fel rhaglen glir o ddatblygiad, un maes yw datblygu’r tîm Anghenion Dysgu Ychwanegol a chydweithio’n agosach i sicrhau ymagwedd gadarn tuag at y ddeddfwriaeth anghenion dysgu ychwanegol a fydd yn cael ei chyflwyno yn 2018.
Fe ganolbwyntiodd y gwasanaeth Pobl Ddiamddiffyn ar y model adferiad ar gyfer oedolion o bob oedran sydd yn teimlo effeithiau ffactorau diamddiffynedd meddyliol, megis iechyd meddwl gwael neu ddigartrefedd. Mae’r tîm bychan hwn wedi bod yn arloesol iawn ac maent wedi cael eu canmol sawl tro am eu ymyriadau. Yn amlwg mae’r Timau Iechyd Meddwl Cymunedol yn ffocws ar gyfer gwelliant yn dilyn y pwysau y gwnaethant eu hwynebu fis Hydref diwethaf, mae yna gynllun gwella ac adnodd penodol ar waith i sicrhau bod pryderon yn cael eu monitro gan y bwrdd iechyd a phroses ddemocrataidd yr awdurdodau lleol.
Rydym yn gweithio mewn modd llawer mwy rhagweithiol gyda’n darparwyr a gomisiynwyd, ac rydym yn cwblhau ein strategaeth gomisiynu at y diben hwnnw, sy’n canolbwyntio’n drwm ar y ffaith mai pobl hŷn yw’r boblogaeth fwyaf yng Nghonwy, ac yn eu mysg nhw y mae’r galw mwyaf am wasanaethau.
Rwyf wedi bod yn falch ofnadwy o weld datblygiad y tîm cyfranogi, yn enwedig gwaith cyngor yr ifanc, ac mae’r rhwydwaith cyfranogi wedi creu argraff ac wedi bod yn werthfawr i’r gwasanaeth, partneriaid ac i ailadroddiad cyntaf Cynllun Corfforaethol newydd Conwy.
Mae heriau yn parhau i fod o’n blaenau, yn arbennig o ran y pwysau ariannol, ond yn ogystal, mae’r cymhlethdod newidiol a’r galw am ofal cymdeithasol yn gofyn am ymagwedd newydd a ffyrdd gwahanol o ymyrraeth ar gyfer gwaith cymdeithasol. At y diben hwn, rydym yn dymuno buddsoddi i newid y system gyfan a gweithredu’r ymagwedd seiliedig ar gryfderau – Arwyddion Diogelwch ym mhob maes gwasanaeth.
Mae ein gweithlu yn bwysig i ni ac er ein bod wedi lleihau mewn nifer, rydym wedi parhau i fod yn dîm eithaf sefydlog, er ein bod wedi cael anhawster recriwtio i ambell swydd Gwaith Cymdeithasol. Rydym yn parhau i weithio mewn partneriaeth gyda Phrifysgol Bangor i sicrhau bod ein rheolwyr rheng flaen yn dylanwadu ac yn siapio’r rhaglen gradd meistr, ac mae nifer fechan ohonynt wedi ymuno â’r tîm.
Rydym yn edrych ymlaen at y flwyddyn sydd i ddod, yn benodol at ddefnyddio’r fframwaith canlyniadau newydd i gael gwell dealltwriaeth o sut mae ein gwasanaethau yn diwallu’r angen, a sut y gallwn ni wella mewn unrhyw fodd. Diolch yn fawr i’r holl staff ac am yr adborth rydym yn ei dderbyn yn rheolaidd sydd yn allweddol i’n llwyddiannau.
Jenny Williams, Cyfarwyddwr y Gwasanaethau Cymdeithasol
Cyngor Bwrdeistref Sirol Conwy
