Safon Ansawdd 3

Mae’r angen am ofal a chefnogaeth yn cael ei leihau a’r cynnydd o ran anghenion yn cael ei atal, tra’n sicrhau bod y canlyniadau gorau posibl yn cael eu sicrhau i bobl

Sut rydym yn prynu a darparu gwasanaethau ar gyfer pobl hŷn

Yn adroddiad y llynedd, fe soniom wrthych am Brosiect Trawsnewid Pobl Hŷn, er mwyn gwella’r ffordd mae gwasanaethau gofal cartref yn cael eu darparu yng Nghonwy. Pwrpas hyn yw:

Sicrhau bod unigolion yn derbyn gwasanaeth hyblyg, modern, sy’n canolbwyntio ar yr unigolyn
Sicrhau bod darpariaeth y gwasanaeth yn cyd-fynd â newidiadau yn y ddeddfwriaeth a rheolau Gofal Cymdeithasol
Addasu i’r heriau recriwtio a chadw staff sy’n wynebu’r farchnad gofal yn y cartref
Sicrhau bod gwasanaethau proffesiynol yn cydweithio mewn ffordd gyson a chydgysylltiedig
Diogelu’r gwasanaeth at y dyfodol ar gyfer y cynnydd a ragwelir yn y galw

Ers y diweddariad diwethaf, cynhaliwyd nifer o weithgareddau ymgynghori er mwyn llywio’r newidiadau sydd angen eu gwneud. Roedden nhw’n cynnwys y materion canlynol:

Rydym wedi edrych ar wersi a ddysgwyd o’r modelau mae awdurdodau eraill wedi eu rhoi ar waith, a dysgu pa mor bwysig yw sicrhau bod newidiadau’n cael eu cyflwyno’n raddol.
Rydym wedi cynnal cynllun peilot i weithio mewn ffordd sy’n canolbwyntio ar ganlyniadau gyda 50 o unigolion sy’n derbyn gofal cartref.
Fe ddysgom nad yw prosesau busnes Conwy yn darparu’r hyblygrwydd sydd ei angen ar gyfer y ffordd newydd hon o weithio a pha mor bwysig yw cael dull cyson.
Rydym wedi ymgynghori gyda 450 o unigolion allan o 700 sy’n derbyn gwasanaethau gofal cartref ar hyn o bryd drwy gynnal arolwg. Roedd 95.2% o’r rhai a ymatebodd yn fodlon neu’n fodlon iawn gyda’r gofal maen nhw’n ei dderbyn ar hyn o bryd. O’r rhai hynny sy’n anfodlon, roedd nifer o’r rhesymau’n ymwneud ag amser a chysondeb, sydd wedi cael eu hymgorffori yn hyblygrwydd y model newydd, ac yn yr hyfforddiant.
Fe wnaethom gynnal digwyddiad ‘cwrdd â’r prynwr’ ar gyfer darparwyr er mwyn esbonio diben y newidiadau rydym yn eu gwneud. Gofynnwyd am adborth am dri chynnig gwahanol, a chynhaliwyd cyfarfodydd un-i-un i ymgynghori ymhellach yn eu cylch.
Rydym wedi ymgysylltu â staff gweithredol, ymarferwyr, Timau Adnoddau Cymunedol a’r holl dimau eraill sy’n rhan o’r broses, megis Safonau Ansawdd a Sicrwydd, Mân Ddyledwyr ac Asesiadau Ariannol. Rydym wedi cynnwys eu hadborth yn y model newydd, boed hynny’n newid i system TG neu ganfod datrysiad gwell i ateb y math o ymholiadau mae unigolion yn ein ffonio amdanynt amlaf.
Rydym hefyd wedi ymgynghori gyda rheolwyr allweddol yn BIPBC ac Aelodau i gael eu hadborth ar y newidiadau rydym yn eu gwneud.

Edrychwch ar yr adran Edrych ymlaen tuag at 2022-23 a thu hwnt i gael rhagor o fanylion am y prosiect wrth i ni symud i’r flwyddyn ariannol nesaf.

Cael adborth gan bobl sy’n derbyn ein gwasanaethau

Fel rhan o’r prosiect i foderneiddio sut rydym yn prynu a darparu gwasanaethau i bobl hŷn, fe wnaethom ofyn am adborth gan bobl sy’n derbyn gofal a chymorth yn y cartref, a gofalwyr di-dâl sy’n derbyn gofal a chymorth. Roedd ymatebwyr yn derbyn rhwng 1 awr a 56 awr o gymorth uniongyrchol bob wythnos; gallai’r cymorth gael ei ddarparu gan ein timau mewnol, neu gan asiantaethau gofal allanol sy’n cael eu comisiynu gennym ni. Ar y cyfan, roedd yr adborth yn hynod o gadarnhaol, gyda 94% o’r ymatebwyr yn datgan eu bod yn fodlon gyda’r gofal a’r cymorth roedden nhw wedi ei dderbyn. Mae pobl yn gwerthfawrogi cysondeb yn y ddarpariaeth gofal, pan fydd yr un tîm neu’r un unigolion yn ymweld ar amseroedd penodol, a theimlir yr effaith pan fydd y gofalwyr yn newid neu pan na fydd amseroedd neu hyd yr ymweliadau yn ôl y disgwyl.

O ran cynorthwyo pobl i gyflawni eu canlyniadau personol, nododd 95% o’r ymatebwyr fod y gofal a’r cymorth maen nhw’n eu derbyn yn eu cynorthwyo i gyflawni’r hyn sy’n bwysig iddyn nhw.

Heb ofalwyr, fyddwn i methu dod o fy ngwely

Mae ymatebwyr yn gwerthfawrogi bod y gofal a’r cymorth maen nhw’n ei dderbyn yn eu cynorthwyo i aros yn eu cartrefi eu hunain a mwynhau rhywfaint o annibyniaeth na fyddai’n bosibl fel arall. Gall gofalwyr anffurfiol gymryd seibiant o’u dyletswyddau gofal gan wybod bod eu hanwyliaid yn cael y gofal gorau.

Mae cael y gofal a’r cymorth yn fy ngalluogi i gael y rhyddid i ddadflino ac ymlacio gan wybod bod rhywun yn gofalu am fy ngŵr.
Gofalwr anffurfiol

Gofynnwyd i bobl beth fydden nhw’n ei newid am y gwasanaeth os gallen nhw, a daeth sawl thema i’r amlwg yn ymwneud â:

Gweithwyr cefnogi’n gallu treulio mwy o amser ar yr alwad a pheidio â gorfod brysio at y cleient nesaf.
Mwy o hyblygrwydd o ran amseroedd a hyd y galwadau.
Gweld yr un gweithwyr cefnogi’n rheolaidd.
Oedran, sgiliau a phrofiad gweithwyr cefnogi yn eu rôl.
Trefniadau seibiant, gan y byddai llawer o ofalwyr anffurfiol yn gwerthfawrogi mwy o amser i’w hunain.

Bu’r ymarfer ymgysylltu hwn yn hynod o werthfawr a bydd yn ein cynorthwyo i lunio penderfyniadau am sut byddwn yn darparu gwasanaethau yn y dyfodol, fel rhan o’r prosiect ehangach.

Gwasanaethau Pobl Hŷn – Heriau Staffio

Mae ein Gwasanaeth Pobl Hŷn yn cydlynu gofal a chymorth o bump Tîm Adnoddau Cymunedol wedi’u lleoli yn Llanfairfechan, Llandudno, Llanrwst, Bae Colwyn ac Abergele. Fe wnaeth ein gwasanaethau asesu a gofal cartref barhau i weithredu yn ôl yr arfer drwy gydol pandemig Covid-19, a chynhaliwyd asesiadau dros y we er mwyn sicrhau diogelwch staff a’r cyhoedd. Wedi dweud hynny, mae’r pwysau sy’n wynebu’r gwasanaeth nawr yn gwbl ddigynsail, ac rydym yn ei chael yn anodd ymdopi â nifer yr achosion sydd gennym, yn enwedig os ydyn nhw’n rhai cymhleth ac angen ymyrraeth a goruchwyliaeth gan Weithiwr Cymdeithasol Cymwys. Ar adeg ysgrifennu’r adroddiad hwn, roedd gennym 320 o achosion heb eu dyrannu, a gall hyn fod yn rhannol am nad oedd unigolion eisiau dod atom i ofyn am gymorth yn ystod y pandemig ac yn lle hynny wedi ceisio rheoli eu hanghenion eu hunain. Mae nifer o unigolion nawr wedi cyrraedd pwynt argyfyngus ac angen cymorth ar frys; pe na bai’r pandemig wedi eu hatal rhag cael mynediad at rwydweithiau cefnogi anffurfiol a theulu, ni fyddai llawer o achosion wedi cyrraedd lefelau anghenion mor uchel. Mae ein timau felly’n ymdrin â niferoedd cynyddol o achosion brys ac yn ymdopi â’r rhwystrau i gomisiynu pecynnau gofal.

Mae’r argyfwng staffio ym maes Gofal Cymdeithasol wedi cael llawer o sylw yn y cyfryngau, ac nid yw Conwy yn eithriad. Yn ein timau Gwaith Cymdeithasol rydym wedi bod yn defnyddio staff locwm a staff asiantaethau i ymdrin â rhywfaint o’r llwyth gwaith, ond oherwydd y gost sy’n gysylltiedig â hynny, nid dyma’r dewis rydym yn ei ffafrio. Mae ein partneriaid allanol yn ei chael yn anodd recriwtio a chadw staff, ac o ganlyniad bu’n rhaid iddyn nhw ddychwelyd pecynnau gofal nad oedden nhw’n gallu eu darparu. Mae ein timau mewnol wedi cymryd cyfrifoldeb dros y rhain, ond maen nhw hefyd yn profi eu hanawsterau eu hunain o ran recriwtio staff.

Beth nesaf?

Rydym yn gobeithio y gallwn ni recriwtio unigolion i swyddi wedi’u targedu yn y timau Gwaith Cymdeithasol ac Ailalluogi er mwyn cynorthwyo i leihau rhestrau aros a chefnogi’r cynnydd yn y galw yn y gymuned. Nod yr ymgyrch recriwtio genedlaethol Gofalwn yw codi proffil Gofal Cymdeithasol fel gyrfa werth chweil, boed hynny gyda’r Awdurdod Lleol neu gyda darparwr preifat. Yn ogystal â’r gobaith y gellir manteisio ar yr ymgyrch genedlaethol, rydym yn rhagweithiol yn ein hagwedd at recriwtio a chadw staff ym maes Gofal Cymdeithasol, ac yn canolbwyntio ar dri phrif faes:

Hyfforddeiaethau Gwaith Cymdeithasol Conwy

Cyflwynwyd rhaglen yn 2009 er mwyn ymdrin â heriau recriwtio ym maes gofal cymdeithasol drwy ddull ‘meithrin eich talent eich hun’.
Mae hyfforddeion yn aros yn eu swyddi gwreiddiol ac yn ennill eu cymhwyster drwy’r Brifysgol Agored.
Yn nwy flynedd gyntaf y rhaglen roeddem yn cefnogi dau weithiwr y flwyddyn. Yn y drydedd flwyddyn, fe wnaethom gynyddu’r cymorth ariannol ar gyfer y rhaglen er mwyn cynyddu nifer yr hyfforddeion i dri bob blwyddyn.
Er mwyn cydnabod yr anawsterau recriwtio cynyddol, sy’n arwain at bwysau aruthrol ar yr adnoddau staffio presennol, byddwn yn cynnig lle ar gyfer pump o hyfforddeion gwaith cymdeithasol yn 2022.

Myfyrwyr Gwaith Cymdeithasol a gweithwyr cymdeithasol newydd gymhwyso

Mae Conwy yn un o dri phartner yn y cwrs MA mewn Gwaith Cymdeithasol ym Mhrifysgol Bangor, felly rydym yn croesawu myfyrwyr ddwywaith y flwyddyn. Gan gydnabod y pwysau sydd ar ein cronfa bresennol o Addysgwyr Ymarfer rydym wedi buddsoddi’n fawr er mwyn cefnogi gweithwyr cymdeithasol profiadol i ennill dyfarniad achrededig Addysgwyr Ymarfer.
O fewn y bartneriaeth dair ochrog rydym wedi cynnal gweithdai gyda’n gweithwyr cymdeithasol a Phrifysgol Bangor i ddiwygio’r cynnwys dysgu ar y cwrs MA. Gwneir hyn er mwyn sicrhau bod y modelau damcaniaethol gwaith cymdeithasol a ddysgir i fyfyrwyr gwaith cymdeithasol, a’r modd y cânt eu rhoi ar waith, yn cyd-fynd â’r arfer orau bresennol ym maes gwaith cymdeithasol.
cymdeithasol sydd newydd gymhwyso yw traean o’r rhai a gafodd eu penodi. O ganlyniad, mae angen i staff gwblhau Fframwaith y Tair Blynedd Gyntaf yn Ymarfer (Gofal Cymdeithasol Cymru). Mae ein Cydlynydd Ymarfer yn arwain y gwaith i gefnogi’r gweithwyr newydd a’u rheolwr drwy’r fframwaith, yn cynnwys cwblhau ‘Cyfuno Addysg a Dysgu Proffesiynol Parhaus’.

Cefnogi dulliau recriwtio i’r sector Gofal Cymdeithasol yng Nghonwy

Rydym wedi darparu adnoddau ar gyfer gwasanaeth newydd, GofalwnCymru.Conwy i gynorthwyo pobl i gael swyddi ar draws y sector gofal, gyda swydd newydd ar gyfer Mentor Cyflogaeth Gymunedol i gefnogi’r gwasanaeth.
Mae’r gwasanaeth yn gweithio’n agos gyda Chanolbwynt Cyflogaeth Conwy i sicrhau bod y sector Gofal Cymdeithasol yn elwa o raglenni cyflogaeth Llywodraeth Cymru.
Rydym yn cydweithio gyda Choleg Llandrillo a chyflogwyr Gofal Cymdeithasol i gydlynu lleoliadau gwaith i fyfyrwyr Iechyd a Gofal Cymdeithasol.

Byddwn yn trafod ein cynlluniau ar gyfer y gweithlu’n fanwl yn ddiweddarach yn yr adroddiad, serch hynny, yn fyr byddwn yn edrych ar:

Ganolbwyntio ar iechyd a lles staff wrth i ni adfer o’r pandemig, yn cynnwys cadw staff a rhannu arfer orau.
Darparu strategaeth ar ei newydd wedd ar gyfer y gweithlu sy’n ymgorffori’r hyn a ddysgwyd o’r pandemig.
Croesawu ffyrdd o weithio newydd a mwy cynhyrchiol sy’n creu cyfleoedd i staff weithio’n hyblyg.
Edrych ar y pwysau sy’n cael ei greu oherwydd maint y llwyth gwaith ar draws yr adran.
Hybu gofal cymdeithasol fel dewis gyrfa.